مفتتح …
تصدق يا صديق ..
إن الحروف واقفه على لسانى
و لِسانى منيش عارف
ولا فاهم
وحــالم يا جدع .. حـــالم
كتير يعنى وانا صاحى
قليل جدا وانا نايم
وصبّـاحى
بلملم دمعتين بايتين على جراحى
وأقول يا رب
–
(1)
مساء الخير يا قلمى
بحبك بجد
وأخاف منك ..
وازعقلك ساعات وأحتد
وأعيش جواك
لو نكهة فكرة ..
تشدنى شد
أحتاس ف الضمه
والشدات
وأتخض
لوجبت الكسرة مكان المد
وتعك الدنيا بالهنّات
(2)
الحياه مليانه ناس
القُريّب والبعيد
واللى طيب
أو عنيد
واللى جمر الصدق
لسوع إحتماله
رغم جمر الدنيا هيّن !
واللى قلبه
من عجينة حب ليّن
واللى ذنبه كل ذنبه
إنه وقت الآه .. يبيّن !
(3)
ولا أى شىء ف الكون يكون
من غير مبادىء يحتويها وتحتويه
لو جمر يقبل صهدها
ولا عمرها بتهون عليه
وهقولك إيه ؟
هاصــرخ على صخــر المعــانى كلها
وهعدى فوق جسر الحقيقه المؤلمه
وهقول كلام يعشق يعانى ف دربها
ولا روحه ترضى تكون ليأس مسلّمه
فما بين نكــــون
أو لا نكـــــون
شعرايه قد النِمنِمه
المراجع
elarabielyoum.com
التصانيف
شعر أدب قصائد شعراء الآداب ملاحم شعرية