نادمون

يا بَعد هاي العيون

***

يوم أسود انتخبنا... نادمون

لا قرينا ولا كتبنا... نادمون

***

گا لوا انسويها فله... نادمون

تالي زاد الطين بله... نادمون

***

گالوا نحقق عداله... نادمون

تالي كل كشختنه باله... نادمون

***

گالوا نوزع اراضي... نادمون

طلع كل الحچي فاضي... نادمون

***

گالوا نسوي المجاري... نادمون

تالي ضربونه بواري... نادمون

***

گالوا انبلط الشوارع... نادمون

تالي بس هَـمّ ومواجع... نادمون

***

گالوا نزيد الرواتب... نادمون

والقصد بس للحبايب... نادمون

***

گالوا انشغل الشباب... نادمون

تالي هذا الحلم خاب... نادمون

***

گالوا التموين يكثر... نادمون

تالي صحنا الله وأكبر... نادمون

***

گالوا انتظروا المزيده... نادمون

شو كعدنا عالحديده... نادمون

***

ولما صعدَوا للمراقي... نادمون

نسوا عدهم شعب باقي... نادمون

***

ولما صعدوا للرياسه... نادمون

گلنه يمكن عدنه ساسه... نادمون

***

ولما صعدوا للنيابه... نادمون

گلنه هذا النصر يابا... نادمون

ولما صعدوا للوزاره... نادمون

گلنه راح تصير چَاره... نادمون

***

ولما صعدوا فوگ فوگ... نادمون

وزعوهه نهب بوگ... نادمون

***

ولما حَصلوا على الدفاتر... نادمون

نسوا عدهم شعب صابر... نادمون

***

وذاك زيدي أبو (ثـُله)... نادمون

ياهو يوصله ويگله... نادمون

***

إمشي اطلع بره بره... نادمون

هذي دجلة تبقه حره... نادمون

***

لا محافظ لا أمين... نادمون

عرفوا بشارعنه طين... نادمون

***

لا محافظ لا أمين... نادمون

حسّوا بهذا الأنين... نادمون

***

ليش نبقه نستدين... نادمون

لا حليب ولا طحين... نادمون

***

حصة ماكو شـَكر ماكو... نادمون

جاي ماكو دهن ماكو... نادمون

***

غاز ماكو نفط ماكو... نادمون

ماي ماكو ضوه ماكو... نادمون

***

شغل ماكو عمل ماكو... نادمون

تالي غير الضيم ماكو... نادمون

***

ودّهم الإرهاب دوم... نادمون

ولا شعبنه يصحه يوم... نادمون

***

من تجينه بعد فرصه... نادمون

هذا اصبعنا ونگصه... نادمون

 

بالبريد الالكتروني

المراجع

mobile.www.albasrah.net

التصانيف

شعر  أدب  قصائد  شعراء   الآداب  ملاحم شعرية