الدنيا هانية

وفاء الحمري

الدْنْيا هَانْيةَ والسْما صافية وما كاين حروبْ
ما كايْنْ عجاج ما كايْن امْواج ما كايْن كْروبْ
والناس فرحانة ونْشْطانة وسْعيدة
والعدل العْريس الزّين بارزْ في الميدة
والحق لابس قشابة وااااسعة وعريضة
لكنْ الزربة خلاتو يلْبسها بالمقلوب

الدنيا هانية والسما صافية ما كايْن حْروب
ماما أمريكا زينةْ المْويمَات
كتلعب الكاش كاش مع الوليدات
الهُنود الحُمْرْ غبْرت ليهم شْقيفات
ووليدات الفيتنام كرضات ليهم العْظيمات
ياك اللّعْب مع ادْراري ما فيه ذنوب ؟

الدنيا هانية والسما صافية ما كاين حروب
مويمْتي أمْريكا جات للعراق مْقصودة
جات الحنينة بالخير والخْمير والجُودة
جايبة البنان والكاوكاو لسْعْد ومْسْعودة
ياك ما حسابلها وْليدات العراق قرودة
تسكتهوم بالوش والنش والكذوب؟؟؟؟

الدنيا هانية وسْما صافية ما كايْن حْروب
خالتي صهيونة الخالة المحبوبة الصغيرة
مشطات ليها ماما أمريكا الضفيرة
وعطاتها نعْجة ودْحشة وبقْرة كبيرة
وشعير وزعبْول وقَنْبول دْخيرة
والقدْس غير هدية ماشي محسوب

الدنيا هانيا وسما صافية ما كاين حْروب
خالتي صهيونة غلاضتْ ودارت الكْرش
وما بقا يقنعها البقرة والحمارة والدحش
بغات تكون هي مولات الزريبة والورش
والمسلمين فيران ، وهي المش
وفورماج القدس هو المطلوب

الدنيا هانية والسما صافية ما كاين حروب
الدْمْ لي فْغَزّة عَنداك يْحْسبليكمْ دْم جَاري
راه غير شوي ديال الما صبغوه ادْراري
وطْلاو بيه كْرشْهم الجيعان العاري
وهووووما لي قطعو ريوسْهمْ باشْفاري
الخبار الحقيقي هو هدا ، وغيرو بهتان وكذوب

الدّنيا هانية والسما صافية وما كاين حروب
ما كاين عْجاج ما كاين امْواج ما كايْن كْروب
والناس فرحانة ونشطانة وسعيدة
والعدْل العريس الزين بارزْ في الميدة
والحقْ لابس قشابة وااااسعة وعريضة
لكن الزربة خلاتو يلبسها بالمقلوب

المراجع

طنجه الادبيه

التصانيف

تصنيف :الادب   


مقالات قد تهمك

تصفح الموسوعة

المقالات الأكثر قراءة