أبو المفاهيم: شو.. وين رايح.. لسّه ما قعدنا..،،.
أبو حكّة: تذكرت إشي ولازم أروح هسّة.
أبو المفاهيم: وشو هالإشي إللي خلاّك تقوم مثل الملسوع..؟؟.
أبو حكّة: بدّك الصحيح.. جًلدي بحكني.
أبو المفاهيم: بدّك كَتْلة يعني؟؟ تراني جاهز أطعميك إيّاها..،،.
أبو حكّة: لا يا مشطوب.. جلدي بحكني بدّي أتحمّم.
أبو المفاهيم: آآه تتحمّم،، وقولك إلَكْ زمان ما تحمّمتْ حتى جلدك يحكّك؟؟.
أبو حكّة: لأ.. بالعكس.. مًشْ موعد حمّامي اليوم.. بسْ خَلَصْ سبحان الله الجلد حكني..،،.
أبو المفاهيم: وإيمتى الموعد إللي مفروض يحكّك فيه جلدك..؟؟.
أبو حكّة: بعد ميتين وخمسة وسبعين يوم..،،.
أبو المفاهيم: إييييييييش؟؟ يخرب بيتك.
أبو حكّة: ها.. بعد ميتين وخمسة وسبعين يوم رَح يصيرلي سنة متحمّم.. يعني ما صار مارّ تسعين يوم إلاّ وجلدي حاكني.
أبو المفاهيم: طيّب ليش هالمرّة تخربطت أمور الحكّة معك..؟؟.
أبو حكّة: لأنّو العالم تغيّر في هالتسعين يوم.. والجسم تحمّل وكأنو مار عليه سنة.. عشان هيك فقد العيار وبلّش حكحكة..،،.
أبو المفاهيم: طيب ليش هالطريقة؟؟ ليش ما تتحمّم كل يوم أو كل يومين يا سيدي..؟؟.
أبو حكّة: بدّك أنظف؟؟ والناس تشوفني نظيف كل يوم؟؟ حرام عليك.. والله إذا اسلمت من الناس ما باسلم من الحكومة.. ورَحْ يحاسبوني من أين لك هذا؟؟ إللي هي النظافة..،،.
أبو المفاهيم: لهالدرجة ممنوع تتحمّم إلاّ كل سنة..؟.
أبو حكّة: وبإذن رسمي كمان..،، وهسّة رايح أقدّم طلب أقلّط فيه موعد الحمام تاعي بلكي وافقواعليه..،،.
أبو المفاهيم: وَلْ وَلْ..،،،.
أبو حكّة: لا وَلْ ولا شَلْ.. حتى تكون نظيف بدّك موافقة..،،،.
المراجع
جريدة الدستور
التصانيف
صحافة كامل النصيرات جريدة الدستور