أبو المفاهيم : أيْشْ ياعبد الجليل ....؟ ما بنشوفك إلاّ وها الخلوي على ذانك ....تقول انك بتمشّي العالم من عليه
عبد الجليل : والله ياخوي ... البلد اهدى من هيك ما فيش .... وقلّة الخياطة بتعلم التطريز .... ومادام ما حدا راحم حدا .... ما رح أرحم حدا من الحكي
أبو المفاهيم : بس انت هيك بدك ميزانية كبيرة تلعب بيها ... فدير بالك لتلعب بيك
عبد الجليل : لا تخاف علي ... اللي بدّي اياه بطلبه ... واللي بًدّو إيّاني بطلبني ..... واللي بًدنا نجامله ( رنّه وأفصل )
أبو المفاهيم : طَيًّبْ شو بتحكو ؟
عبد الجليل : ما قلنا لك البلد هادية ... ...أنا حبيباتي كثار وصاحباتي أكثر .... مثلي مثل غيري هات يا لَقْ وهات يا نَقْ
أبو المفاهيم : طَيًّبْ ياخوي علمني شوية حكي من حكيكو ...
عبد الجليل : خلك في حالك ياأبو المفاهيم ... ترى المهو متعود ...خراب بيت وجنان وانت عندك غبشة مهي عن كتيبة نسوان
أبو المفاهيم : بتحكو حكي سافل زَيْ ما أسمع
عبد الجليل : ظلّك بره الموضوع يا زلمه
أبو المفاهيم : بتحكو بهموم البلد ؟
عبد الجليل ( يضحك ) : آه ...آه ... بنحكي
أبو المفاهيم : عارف وين صارت الأمور .....
عبد الجليل : طبعاً عارف .... في عندي موعدين المساء وعندي ( شوبنغ ) قبليهن
أبو المفاهيم : هاي هي اخبار البلد ...؟
عبد الجليل : حل عني يازلمه .... خليني بالفاضي تبعي
أبو المفاهيم : بطلعلك .... والله بطلعلك .... الحق مش عليك ....الحق ع اللي مش قادر يعبّي الفاضي بالمليان
عبد الجليل: طيّب أنا فاظي وشغلي فاظي ..إنتَ شو إللي حارّ جْمارَكْ ؟؟
أبو المفاهيم: إللي قاهرني إنّك وأمثالك مش حاسّين بإللي يصير
عبد الجليل : وإللي خَلَقَكْ حاسين أكثر منّك ومن أشكالك ..بس قلّة الحسّ أحسن ..خليك عَ الفاظي تطلع راظي
أبو المفاهيم : بس البلد فًظْيتْ من وراكو
عبد الجليل : إحنا إللي فْظينا من ورا البلد ..وإذا بدكوا نتحاسب تعالوا ..ورَحْ نشوف ساعتها مين اللي حساباتو فاظية ومين إللي حساباتو مليانة..
أبو المفاهيم : هاظ إنت طلعت مليان ؟؟
عبد الجليل : لأ ..دخيلك ..أنا فاظي وحكيي فاظي ..وخلي المليان إلكو
المراجع
جريدة الدستور
التصانيف
صحافة كامل النصيرات جريدة الدستور