أنا المواطن ناقص هزيمات : حامل لواء الشكوى و الأنين : أقرّ و أعترف بأنني مقصّر مع ناس كثير : ومع جهات أكثر ..،، أقر وأعترف بأنني مش فاضي أحكّ راسي لأشكر من يتوجّب عليّ شكره ..،،
مش فاضي أشكر من رفعوا الأسعار : لأنني منشغل بالرفع ..،، ومش فاضي أمشي للسوق كي أحيّي الناس التي تتمشّى مثلي و ترفع شعار ( ما دام الفرجة ببلاش : تفرّجْ و لا يهمك ..)..،،
مش فاضي أروح على أي حدا لأطمئن على أي شيء : لأن الـ ( حدا ) أكيد ورطان مع الـ ( أي شيء ) : و أقدم اعتذاري له من الآن لأنني مش عارف ليش ما تواصلتُ معه للآن : يجوز لأنني أبحث عنه وأنا قاعد دون حراك ..،،.
مش فاضي : والله مش فاضي أروح أعمل فحوصات مهمة جداً : وليس لأنني خايف من نتيجة الفحوصات و لا ليس لأن ثمن الفحوصات ليس بجيبي ..،، آه كم أتوق إلى فحوصات ليس بها منغّصات ما قبل الفحص ..،،
مش فاضي أستمتع بالشوب : موجة ورا موجة وأنا نفسي أسلّم على أي موجة و أقول لها : يا حامية خلّي ( حمّك) بدم العرب لعل و عسى يطلع منهم ما هرب منهم و لم يعد إليهم لغاية الآن ..،،
مش فاضي أبكي : مش فاضي أضحك ..مش فاضي ألعب : مش فاضي أقعد ..مش فاضي أحكي : مش فاضي أخرس ..مش فاضي لأي شي كي أعرفني ..فأنا فاضي تماماً للنوم ..رجاء ما حدا يزعجني ..،،
المراجع
جريدة الدستور
التصانيف
صحافة كامل النصيرات جريدة الدستور