استاء ( ناقص هزيمات ) من حالة الهدوء التي يمرّ بها كمواطن ..لأنه اعتاد على الضجة ..اعتاد على الفوضى ..اعتاد على نكش المناخير في الشارع العام إذا لم يجد ما يعمله ..فقرر أن يفعل شيئاً فيه بصمة على كيف كيفكو ..
احتار ناقص هزيمات : هل يذهب لأي أمسية شعرية في أي محفل ثقافي ويقوم عامل هيزعيّة هناك و يخرّبها فوق روسهم ..؟ وبعد طول تفكير صرف النظر عن الأمسية الشعرية لأن الأمسية أصلاً لا يحضرها إلا الشاعر و زوجته و واحد جاي يستنى في واحد و المصري إللي يعمل قهوة و شاي ..
فكّر ناقص هزيمات أن يذهب لأي كوفي شوب وهناك يطلب واحد شاي و اثنين قهوة و ثلاثة سحلب و أربعة أرجيلة و خمسة يتهاوش معهم ..و لكنه تراجع..فالناس إللي بالكافيه قد يكون من بينهم واحد معه (أي دان بالكاراتيه)..كمان الكافيهات دايما قريب منها شرطة : فبلاش البهدلة الأكيدة ..
طيب وين يا ابن هزيمات وين ممكن تعمل شغلة عليها العين و تشغل الناس لأسابيع و تحرّك البلد : مهي البلد ناقصها كمان ..؟؟ لو بدك تصف سيارتك بنص الشارع الرئيسي و تعمل أزمة : ربع ساعة و بجيبوا ونش و يشيلوها ..ولو بدك تعمل شو ما تعمل رايحين يكتشفوا أمرك و بالأخير تطلع الأمور على راسك ..وإنت بدك شغلة ما تنكشف فيها و فيها ناس كثير..وبدك يختلط الحابل بالنابل ..وانت زلمة فاضي لا وراك لا شغلة ولا عملة..فلازم تلعب بالبلد شوية و لو من باب التسلية ..طيب وين ..وين..؟؟ وين في مكان ممكن تنطبق عليه المواصفات المطلوبة للعبتي ..مش معقول تظل قاعد هيك ..جلدك يحكك ..ولازم تخربط الناس شوية ..؟
فكر ناقص هزيمات..أهلك ثلاثين فنجان قهوة و كروز ونص دخان وهو يفكّر..وأخير جاءه الشيطان ..قال له : حرام عليك ..أي أنا شيطان و حزنت على وضع البلد ..فقال ناقص هزيمات : انت خلّيك بعيد : أنا نيتي صافية ..بس بدي أتسلّى شوية ..فقال له الشيطان : وشو ناوي تعمل ..؟؟ فقال الناقص : بدي أروح على مباراة الوحدات و الفيصلي وأندس هناك و أقلبها على روسهم ..؟ فقال له الشيطان وهو يولّي هارباً : لا يا عمّي خليني شيطان أحسنلي ..يقولوا شيطان اعوذ بالله منه : ولا يقولوا ( مُندس ) الله يلعنه ..
المراجع
جريدة الدستور
التصانيف
صحافة كامل النصيرات جريدة الدستور