كلب جيجي

أتصدقون ..؟ أنا البدويّ عندي صديقة اسمها جيجي ..،، تخيّلوا ..أنا الضارب أطنابي في الخشونة و الدفاشة ..أكون صديقاً لـً ( جيجي ) ..،، لأ ومش هيك كمان : جيجي صديقتي من سكان عمّان ..لأ ومش هيك كمان ..مش أي عمّان ..عمّان الراقية ..،،

ذات يوم : ذهبتُ إلى مكان عمل ( صديقتي جيجي ) ..قلت لحالي : يا ولد : ميّل و سلًّم ..عيب توصل وما تسأل ..وتفاجأتُ أن ( صديقتي جيجي ) مُجازة مرضيّاً ..فقلت لحالي مرّة أخرى : يا ولد : عيب تعرف إنها مُجازة مرضيا و تتصل فيها ولو من باب المُججاملة ..وهاي ( جيجي ) مش أي حد ..،، فقمتُ لاطشها تلفون ..وبعد المُقدمات الأردنية الضرورية ..علمت أن (كلبها ) هو سبب الإجازة ..ولما قالت : كلبي ..فكرتها تقصد قلبي ..بس طلع كلب كلب ..يعني عو عو أصلي ..و علمتُ فيما يعلم الجائع الفقير ..أن كلبها له تطعيمة ولازم يروح ياخذ الإبرة ..وكل الإجازة عشان هيك ..،،

احترت ماذا أقول لها ..فإذا قلت لها : سلامة كلبك ..سأشعر بتفاهة كبيرة ..وإذا ما حكيت ..يجوز (صديقتي جيجي ) تأخذ على خاطرها و تعتبرني (سوفاج كتير كتير )..،، فعشان هيك أنقذتني سخريتي وقلت لها : أنا مش متعود على هيك مواقف يا جيجي ..بس تقدري تبلغي كلبك أمنياتي له بالشفاء..،،

قبل يومين ..رأيتُ ( صديقتي جيجي ) ..وعلى طول سألتها : كيف صحة كلبك ..ممكن تحجزيلي موعد معه ..نفسي أشوفو ..؟، ..قالت لي : تعال ..،، وأخرجت الموبايل وشفت كلبها بصور كثيرة وفي أماكن كثيرة ..و بقدر أطمئن القرّاء انه ( كلب عز ) ..وأن وجه الكلب ( بيبي فيس ) ..وأن جيجي كتير مبسوطة بكلبها ،،

سألتُ ( صديقتي جيجي ) عدة أسئلة فوعدتني بإيميل فيه تفصيلات : ماذا يأكل كلبك ..نوع المعلبات ..كم مرة يستحم ..؟؟ ما نوع الشامبو ..؟؟ كم مرة يطلع رحلات في الأسبوع ..؟؟ مم يتضايق ..؟ هل يسمع أخبار ..؟ هل يكنكن ..؟ هل يفهم بالظلم ..؟ وهل ما زال الكلب وفيّاً ..؟ ..وآخر سؤال : والله يا جيجي إني مستحي من حالي وأنا أحكي ( كلبك حاف ).

المراجع

جريدة الدستور

التصانيف

صحافة   كامل النصيرات   جريدة الدستور